06.03.2010
Prifti: Kompanitë shqiptare kanë prioritet në procesin e privatizimit.



“Ne na intereson t’i blejë biznesi shqiptar këto prona. Parashikojmë 100 mln euro kontribut për buxhetin e shtetit”

Ministri i Ekonomisë, Tregtisë dhe Energjetikës, z. Dritan Prifti ka deklaruar se çdo pronë shtetërore, me përjashtim të HEC-eve në kaskadën e Drinit, shkollave dhe spitaleve, do të privatizohet. Ministri u shpreh gjatë një konference për shtyp, se tashmë është ngritur grupi i punës për të vendosur cilat do të jenë asetet që do të privatizohen. “Çdo pronë shtetërore do t'i nënshtrohet privatizimit me përjashtim të tre hidrocentraleve të mëdha mbi kaskadën e Drinit, si dhe objekteve që shërbejnë në sektorin e shëndetësisë dhe arsimit”. Por, më e rëndësishmja në atë që përmendi ministri Prifti ishte se avantazh në privatizimin e këtyre ndërmarrjeve do të kenë firmat dhe subjektet shqiptare pastaj ato të huaja. “Është ngritur një grup i posaçëm pune në drejtimin e kryeministrit Berisha për të mbledhur informacione që dorëzohen në METE për të gjitha asetet, ndërmarrjet, që duhet të hyjnë në proces privatizimi”, u shpreh ministri Prifti.

Sipas tij, në procesin e privatizimit janë mobilizuar 100 persona. “Kemi mobilizuar 100 persona që do të përfshihen në këtë proces, që do të merren me vlerësimin e pronave dhe mbështetjes të të gjithë procedurës së privatizimit. Direktiva është për të privatizuar çdo pronë shtetërore me përjashtim të HEC-eve të kaskadës së Drinit, të shëndetësisë e arsimit”, ka vlerësuar më tej kreu i ekonomisë shqiptare. Ndërkohë, ministri Prifti pohoi se aksionet, ndërmarrjet shtetërore, asetet dhe pronat do të vihen në proces privatizimi që shteti dhe qeveria të kursejë më shumë nga shpenzimet e veta. “Ne parashikojmë 100 milionë euro kontribut për buxhetin e shtetit nga privatizimi. Tashmë ka mbetur privatizimi i pjesë së mbetur të ALBTELEKOM dhe ARMO-s, po ashtu është ngritur edhe një grup pune për privatizim e INSIG-ut”, nënvizoi Prifti. Ministri i ka bërë apel biznesit shqiptar që të përfshihet në privatizim. “Ne jemi të interesuar që biznesi shqiptar të përfshihet në privatizim”, shtoi ai. Ndër të tjera, ministri i METE-s tha se do të privatizohen 450 reparte ushtarake, pasi nuk përdoren më nga Ministria e Mbrojtjes.

Qeveria pritet të arkëtojë nga privatizimet në këtë vit rreth 100 milionë euro. “Direktiva është për të privatizuar pothuajse çdo gjë. Kemi filluar procesin e privatizimit të pjesës së mbetur të Albtelekomit. Po fillojmë procesin e privatizimit të pjesës së mbetur të ARMO-s. Kemi filluar procesin e përzgjedhjes së konsulentëve ndërkombëtarë për privatizimin e Albpetrol-it. Është ngritur një grup i posaçëm pune ndërministror për privatizimin e INSIG-ut. Kemi me dhjetëra ndërmarrje, fabrika apo uzina që sot janë në procese likuidimi. Por në të njëjtën kohë, ne parashikojmë të shkojnë në këtë vit të paktën në 100 milionë euro kontribut për buxhetin e shtetit nga procesi i privatizimit”, u shpreh ministri Prifti. Kreu i dikasterit të ekonomisë, i cili do të menaxhojë procesin, ka ftuar sipërmarrësit shqiptarë të bëhen pjesë e këtij privatizimi dhe ka specifikuar të drejtën e pronarëve për parablerje. “Unë do t'i bëj thirrje të gjithë atyre që kanë dëshirë të përfshihen në blerjen e këtyre pasurive. Mbi të gjitha, ne do të na interesonte t'i blinin shqiptarët, biznesi shqiptar, investitorët shqiptarë. Pronarët kanë të drejtën e parablerjes, kur një pronë shtetërore ka qenë pronë e tyre ose toka ka qenë pronë e tyre. Atëherë, ata kanë të drejtën e parablerjes dhe në këtë rast nuk ka konkurrim. Edhe në rastet kur prona shtetërore është e marrë me qira nga një subjekt apo nga një individ nëse është investuar më shumë se 150% e vlerës së objektit nga qiramarrësi, atëherë blerja e saj do të jetë pa konkurrim”, përfundoi ministri i Ekonomisë, Tregtisë dhe Energjetikës, Dritan Prifti.

Procesi i vlerësimit të pronave do të bëhet nga Ministria e Ekonomisë, Tregtisë dhe Energjetikës, ndërkohë ankandet e shitjeve do të realizohen nga Ministria e Financave. Shitja e tyre, sipas zyrtarëve të Ministrisë së Financave, do t’u nënshtrohet një sërë procedurave. Në këtë mënyrë, për të gjitha ato raste, kur konfirmohet se objekti ndodhet në truallin e subjekteve të shpronësuara, shitja bëhet pa ankand dhe subjektet e shpronësuara të truallit, në zbatim të Ligjit nr. 9235, datë 29.7.2004, “Për kthimin dhe kompensimin e pronës”, të ndryshuar, kanë të drejtën e parablerjes së objektit me vlerën fillestare. Në ankandet për shitjen e pasurive të shoqërive në likuidim e sipër nuk zbatohet e drejta e parablerjes për ish-pronarët e truallit. Ata marrin pjesë në ankand si të gjithë të tjerët. Në rastet e shpalljes fitues, ish-pronarëve u zbritet vlera e truallit, e njohur apo e kthyer, me vendim të Komisionit të Kthimit dhe Kompensimit të Pronave, e vlerësuar me çmimet e hartës së vlerës së truallit, miratuar nga Këshilli i Ministrave.

Të gjithë investitorët e huaj apo edhe ata shqiptarë që do të futen në procesin e privatizimit të ndërmarrjeve apo objekteve shtetërore do të mund të marrin informacion nëpërmjet internetit. Duke pasur parasysh se viti 2010 do të jetë viti i privatizimeve, është ngritur një grup pune, i cili po bën rivlerësimin e të gjitha aseteve që parashikohet të hyjnë në këtë proces. Krahas kësaj pune, është vendosur edhe procedura se si do të njihen investitorët me kompanitë dhe objektet që do të futen në privatizim. Kështu, sipas kësaj procedure, të gjitha materialet për këto kompani do të hidhen në faqen e Ministrisë së Ekonomisë, ku do të jenë të hapura për publikun. Për objektet shtetërore përveç të dhënave bazë që kanë të bëjnë me vendndodhjen, çmimin apo sipërfaqen do të ketë edhe disa fotografi që do të mund t'u krijojnë personave të interesuar idenë e qartë për këtë ndërtim si dhe vlerën e tij. Për sa i përket ndërmarrjeve shtetërore do të ketë të dhëna më të detajuara që kanë të bëjnë me numrin e punonjësve, bilancin e tyre apo dhe me fitimet që kanë pasur në vite. Sipas parashikimeve të Ministrisë së Financave, gjatë këtij viti qeveria do të nxjerrë në shitje edhe 24 përqind të aksioneve shtetërore të mbetura në Operatorin e Sistemit të Shpërndarjes, 25 përqind të aksioneve të Albtelekomit, si dhe 15 përqind të aksioneve në kompaninë ARMO. Ndërkohë, një ndër objektivat kryesore për këtë vit do të vazhdojë të mbetet privatizimi i kompanisë së sigurimeve INSIG.

Tashmë, qeveria shqiptare e ka vendosur si objektiv kryesor realizimin e privatizimeve të të gjitha aksioneve shtetërore dhe pritet që brenda tremujorit të parë të fillojë ky proces. Me anë të kësaj strategjie, qeveria shqiptare do të heqë dorë nga këto kompani dhe vëmendja e saj do të përqendrohet në vënien në efiçencë të sektorëve të tjerë, siç janë hekurudhat apo edhe sektorët e shërbimeve. Nga ana tjetër, të ardhurat që do të përfitohen prej këtij procesi mendohet të kalojnë për investimet publike dhe kryesisht për infrastrukturën. Gjithashtu, pritet që një pjesë e këtyre parave të kalojnë për fondin e kompensimit financiar të subjekteve të shpronësuara, i cili pritet të pësojë sërish rritje në vitin e ardhshëm.

Procedurat e publikimit fillojnë pasi të jenë dorëzuar në Drejtorinë e Administrimit dhe Shitjes së Pronave Publike, në Ministrinë e Financave, dokumentet e vlerësimit të objektit. Drejtoria e Administrimit dhe Shitjes së Pronave Publike, në Ministrinë e Financave, e pranon dosjen e objektit, nëse për këtë objekt ka dokumentacion të rregullt, i cili u ka kaluar strukturave përkatëse, të përcaktuara në këtë vendim. Në të kundërt kërkohet plotësimi i dokumentacionit. Nga ana tjetër, vlera e fillimit të ankandit është VAM-i, i përcaktuar sipas kreut II, të këtij vendimi (mjete kryesore + mjete xhiroje + vlera e truallit). Ankandi zhvillohet vetëm për vlerën e mjeteve kryesore, vlerën e truallit, si dhe vlera e mjeteve të xhiros shtohet sipas inventarit fizik, në çastin e dorëzimit të objektit. Drejtoria e Administrimit dhe Shitjes së Pronave Publike, në Ministrinë e Financave, pasi ka pranuar dokumentet e vlerësimit të objektit, ndërmerr hapat përkatëse për publikimin e tij për privatizim, si më poshtë vijon: Periudha e botimit zgjat 21 ditë nga data e botimit të parë dhe bëhet në çdo botim të Buletinit të Njoftimeve Publike, brenda këtij afati. Dita e parë e botimit është data e përcaktuar në njoftimin, që Drejtoria e Administrimit dhe Shitjes së Pronave Publike, në Ministrinë e Financave, dërgon për botim. Brenda këtij afati, ky njoftim botohet edhe në një gazetë, me qarkullim kombëtar.