03.03.2010
Përfaqësuesi i kompanisë austriake e konsideron të shkëlqyer klimën për të bërë biznes në Shqipëri



Brenda muajit mars do të nisin punimet për ndërtimin e hidrocentralit të Ashtës, me fuqi prej më se 57 MW, i cili parashikohet të përfundojë në 3-mujorin e fundit të vitit 2012. Lajmi është bërë publik me dt 3 Mars 2010 në Tiranë nga drejtuesit e kompanisë “Verbund”, dhe ministri i Ekonomisë Tregtisë dhe Energjetikës, z. Dritan Prifti, i cili theksoi se projekti i Ashtës është ndër më të fuqishmit që po ndërtohet në Shqipëri, ndërsa investimi është jo vetëm më i rëndësishmi, por edhe më i madhi. Sipas ministrit të Ekonomisë, ndërtimi i këtij projekti energjetik do t’i sjellë vendit një sasi shtesë energjie prej 57 megavatësh, gjë që do të ulë dhe nivelin e importeve. Në një konferencë për shtyp në hotel “Rogner” drejtues të kësaj kompanie si dhe ministri i Ekonomisë Tregtisë dhe Energjetikës, z. Dritan Prifti njoftuan nisjen e punimeve për ndërtimin e këtij HEC-i një investim ky prej rreth 200 milionë euro dhe që pritet të punësojë mbi 300 punëtorë shqiptarë.

Sipas ministrit Prifti, duke e vlerësuar si histori suksesi bashkëpunimin me këtë kompani tha se kompania Verbund e konsideron si të shkëlqyer klimën për të bërë biznes në Shqipëri.

Ministri Prifti u ndal edhe në ecurinë e koncesioneve të tjera në vend. “Nga 50 koncesione të dhëna vitet e fundit 34 prej tyre janë në proces pune dhe po kontribuojnë pozitivisht në rritjen ekonomike të vendit ashtu si edhe në eliminimin e varësisë nga importi”, tha Prifti. “Kompania Verbund, u shpreh Prifti, ka shprehur interes edhe për koncesione të tjera në fushën energjetike”. Ai e ftoi kompaninë Verbund të marrë pjesë edhe në tenderët e tjerë që sipas tij shumë shpejt do të shpallen nga METE siç është ai i ndërtimit të HEC-eve mbi lumin Vjosa, Osum, etj.



Ndërkohë, anëtari i bordit të menaxhimit të Verbundit dhe përgjegjës për projektin, Kristian Kern tha se dinamika e Shqipërisë është mbresëlënëse dhe se po vendosen standarde të reja në lidhje me kohën dhe ritmin e bashkëpunimit me investitorët. “HEC-i i Ashtës, ndërkohë edhe HEC-i më i madh në botë ku është përdorur teknologjia HYDROMATRIX, pritet të sigurojë furnizimin me energji të sistemit energjetik shqiptar, si dhe t'i japë një shtysë pozitive rajonit dhe vendit”, tha Kern. Sipas tij, nëpërmjet një investimi prej 200 milionë euro HEC- i i Ashtës pritet të prodhojë 242 milionë kWh energji elektrike në vit duke siguruar furnizimin e më tepër se 100 mijë familjeve shqiptare, si dhe punësuar 300 punëtorë shqiptarë. Përsa i takon shpronësimeve, Kern tha se ato do të kryhen me çmimet e tregut evropian.

HEC i Ashtës është i ndarë në dy pjesë: fillimisht energjia do të gjenerohet në hidrocentralin Ashta I, ku 45 turbina të tipit matrix do të furnizohen me deri 530 m3/s ujë. Kjo risi teknologjike vë në përdorim disa turbina të vogla në bazë të së cilave mundësohet shfrytëzimi i prurjeve të pakta, duke rritur në këtë mënyrë eficensën e prodhimit. Elektriciteti do të gjenerohet për një herë të dytë në hidrocentralin Ashta II, pas një kanali që gjendet më poshtë, 5 km pranë fshatit të vogël të Ashtës, pjesë e komunës së Bushatit. Duke filluar nga viti 2012 energjia e prodhuar do të ushqehet në rrjetin shqiptar 110 kV. HEC-i i Ashtës do të prodhojë energji nga burime të rinovueshme duke evituar në këtë mënyrë emetimin e CO2. Kjo do të ndihmojë përpjekjet e Kombeve të Bashkuar për reduktimin e emetimit të gazeve serrë. Për 15 vitet e ardhshme energjia e prodhuar në Ashtë do të blihet tërësisht nga Koorporata Elektroenergjetike Shqiptare. Më pas kontrata mund të zgjatet ose energjia e prodhuar do të shitet lirisht në treg. Verbund është kompania kryesuese e prodhimit dhe transmetimit të energjisë elektrike në Austri.



Me qëllimin për të dhënë një produkt sa më cilësor, përmes teknologjisë moderne Verbund kërkon të aplikojë në Ashtë standarde evropiane. HEC-i i Ashtës është një projekt i që vendos standarde në këtë sektor, i padëmshëm për mjedisin ndërtuar nga kompani shqiptare. Do të jenë afërsisht 32 milionë euro që do t’i shkojnë kompanive shqiptare drejtpërsëdrejti apo jo të cilat do të bashkëpunojnë me lojtarë ndërkombëtarë si Andritz, Siemens apo Porr. Projekti do të zbatohet nën Mekanizmin për Zhvillimin e Pastër (CDM – Clean Development Mechanism) në bazë të Protokollit të Kiotos të Kornizës së Konventës së Kombeve të Bashkuara për Ndryshimet Klimatike (UNFCCC). Shqipëria iu bashkëngjit Konventës në vitin 1995 si pjesë Non-Annex 1 dhe më pas Protokollit të Kiotos në vitin 2004. MZHP-ja është një proces relativisht i ri në Shqipëri. Korniza ligjore dhe institucionale për financimin e karbonit është vendosur në vitin 2009 dhe Ministria e Mjedisit është caktuar të jetë Autoriteti Kombëtar i Deleguar për MZHP-në në Shqipëri. Energji Ashta pati tashmë rastin të provonte se ishte një partner i ri i besueshëm për Shqipërinë dhe veçanërisht për Komunën e Bushatit. Gjatë viteve 2008, 2009, 2010 janë mbajtur tre takime informimi për publikun. Në bashkëpunim të ngushtë me kryebashkiakun janë përcaktuar disa ndryshime në infrastrukturë, ndërkohë që gjatë përmbytjeve të janarit 2010 Verbund u tregua e gatshme të ndihmonte të prekurit me ushqime dhe të mira të tjera ndihme.